सप्तरी – सगरमाथा लोकमार्गमा पर्ने दिक्तेल–गाईघाट सडक खण्डअन्तर्गत सुनकोसीस्थित फोक्सिङटारमा अस्थायी बेलिब्रिज जडान गरिएपछि सिधा यातायात सुरु भएको छ  ।

सगरमाथा लोकमार्गअन्तर्गत पर्ने सुनकोसीस्थित फोक्सिङटारमा बनाइएको अस्थायी बेलिब्रिज । तस्बिर : कान्तिपुर
खोटेहाङ गाउँपालिका–९ लिच्कीराम्चे र उदयपुरको रौतामाई गाउँपालिका–५ आँपटारको बीचमा पर्ने फोक्सिङटारमा बेलिब्रिज बनेपछि आइतबारदेखि यातायात सेवा खुलेको हो ।रेग्मी निर्माण सेवा कम्पनीले ८४ लाख बजेटमा जडानको काम सकेको सडक कार्यालायका प्रमुख गोपाल खकुरेलले बताए । उक्त बेलिब्रिज करिब ५० मिटर लम्बाइको छ । हिउँदमा बेलिब्रिज लगाउने र वर्षामा झिक्ने भएकाले बर्सेनि लाखौं खर्च हुने गरेको छ । उक्त स्थानमा निर्माणाधीन सडक पुल बेलामा नबनेपछि राज्यको लाखौं खर्च हुने गरेको हो । सिधा यातायात सुरु भएपछि दैनिक उपभोग्य वस्तुको मूल्य सस्तो हुने नेपाल चेम्बर्स अफ कमर्स खोटाङका अध्यक्ष खुसनारायण सैंजूले बताए । उनका अनुसार प्रतिकेजी पाँच रुपैयाँका दरले मूल्य सस्तो हुनेछ । यसका साथै निर्माण सामग्रीको ढुवानी भाडासमेत घट्नेछ ।

फोक्सिङटारमा निर्माणाधीन पक्की आर्क ब्रिजको काममा ठेकेदारको लापरबाहीले पाँच वर्षदेखि बेलिब्रिज लगाइँदै आएको छ । उक्त निर्माण कम्पनीलाई छिटो निर्माणका लागि ध्यानाकर्षण गराउने र अटेर गरे सम्बन्धित निकायमा कारबाही प्रक्रियाका लागि पहल थालिने प्रतिनिधिसभा सदस्य विशाल भट्टराईले बताए ।