सप्तरी – प्रधानमन्त्री ओलीले संवैधानिक परिषदसम्बन्धी अध्यादेश फिर्ता लिन तयार भएसँगै विभाजनतर्फ उन्मुख भएको नेकपाको विवाद तत्कालका लागि टरेको छ। अध्यादेश फिर्ता लिन ओली तयार भएसँगै संसदको विशेष अधिवेशन बोलाउनका लागि ओली इतरको समूहले गरेको प्रक्रिया पनि रोकिएको छ ।

एउटा खड्गो टरेपनि नेकपा भित्रको पुरानो विवाद भने यथावत नै छ । पार्टीको विवाद समाधानका लागि प्रधानमन्त्री ओली र नेकपाका अध्यक्ष प्रचण्डबीच आज पनि छलफल हुने भएको छ । प्रचण्डनिकट स्रोतले दिएको जानकारी अनुसार बिहीबार दिउँसोतिर ओली र प्रचण्डबीच छलफल हुनेछ ।त्यस छलफलमा संवैधानिक पदहरुमा नियुक्तिका विषयमा छलफल हुनेछ । साथै पार्टीको सचिवालय बैठक हुँदै स्थायी समितिमा पुगेका अध्यक्षद्वयका प्रस्तावका विषयमा पनि छलफल हुने स्रोतले जनाएको छ । अध्यक्षद्वयका प्रस्तावका विषयमा बुधबारको बैठकमा भएको निर्णयका बारेमा दुवै समूहको फरक–फरक दावी रहँदै आएको छ । बैठक सकिने प्रचण्डले प्रस्ताव फिर्ता लिन तयार भएपछि ओली अध्यादेश फिर्ता लिन तयार भनी ओली पक्षको तर्फबाट प्रचार गरिएको थियो।प्रचण्ड–नेपाल समूहले भने दुवै अध्यक्षका प्रस्तावमा स्थायी समिति बैठकमा छलफल गरी बैठकले यसलाई निष्कर्षमा पुर्याउने निर्णय भएको बताउँदै आएको छ । बुधबारको बैठकमा प्रचण्डको प्रस्ताव फिर्ता गर्ने विषयमा भने कुनै निर्णय नभएको जानकारी बाहिर आएको छ। स्रोतले दिएका जानकारी अनुसार बुधबारको ओली–प्रचण्डको छलफलमा पार्टीमा नयाँ समझदारीका विषयमा छलफल हुनसक्ने छ ।

अबका दिनमा दुई अध्यक्षको लेनदेनमा बाँकी पक्षलाई बेवास्ता गर्दै कुनै समझदारी गर्ने पक्षमा भने प्रचण्ड नरहेको स्रोतको भनाइ छ ।