सप्तरी -काठमाडौं उपत्यकामा नि:शुल्क खाना खुवाउँदै आएको ‘हाम्रो टिम नेपाल’ले काम नपाउनेलाई कृषि फार्ममा रोजगारी दिने भएको छ।

हाम्रो टिम नेपालका अध्यक्ष विमल पन्तले गाँस, बास र कपास नहुने व्यक्तिलाई कृषि फार्ममा रोजगारी दिने योजना अनुसार काम भइराखेको बताए।अहिले काठमाडौं उपत्यकामा कोठा लिएर बस्ने तर काम नपाउनेलाई रासन पानीको व्यवस्था गरिदिएको र कोठा पनि नहुने व्यक्तिलाई बस्ने र खाने व्यवस्था गरेको पनि उनले बताए।‘अब भने कोठा पनि नहुने र काम पनि नपाउनेलाई तराईको कुनै ठाउँमा कृषि फार्म सञ्चालन गरी रोजगारी दिन लागेका छौं’, उनले भने। अहिले हाम्रो टिम नेपालमा खाना खान आउनेमध्येका करिब ७०/८० जनालाई कृषि फार्ममा लगाउने पनि पन्तले बताए।हाम्रो टिम नेपालले मंगलबार काठमाडौंमा कोठा लिएर बसेका तर काम नपाएका व्यक्तिका परिवारलाई खाद्यान्न वितरण गरेको छ।

नवनियुक्त प्रहरी अतिरिक्त महानिरीक्षक (एआइजी) विश्वराज पोखरेलले खाद्यान्न उपलब्ध गराएपछि वितरण गरिएको पन्तले बताए।