सप्तरी – विराटनगर महानगरपालिका– ४ इक्राहीस्थित सडकमा गुडिरहेको ट्याक्टर एक्कासी नहरमा खस्दा भएको दुर्घटनामा परेर आइतबार राति चालकको मृत्यु भएको छ ।

इक्राहीस्थित भित्री सडक खण्डमा दक्षिणतर्फ जाँदै गरेको अनटेस्ट ट्याक्टर राति १०:२० बजेतिर आफै अनियन्त्रित भएर नहरमा खसेको थियो । दुर्घटनामा चालक सुनसरीको बर्जु गाउँपालिका–६ चिमडीका ५५ वर्षीय आशाराम चौधरी गम्भीर घाइते भएका थिए । दुर्घटनामा घाइते भएपछि उपचारका लागि कोसी अस्पताल लैजाँदै गर्दा चौधरीको बाटैमा मृत्यु भएको मोरङ ट्राफिक प्रमुख प्रहरी निरीक्षक राकेशकुमार पोदारले जानकारी दिए ।

सडकमा गुडिरहेको ट्याक्टर नियन्त्रण गुमाएर लगभग १० फिट तलको नहरमा खस्दा दुर्घटना भएको पोदारको भनाइ छ । प्रहरीले घटनाको अनुसन्धान गरिएको जानकारी दिएको छ ।