सप्तरी – सिन्धुलीको दुधौलीमा ट्याक्टर दुर्घटना हुँदा चालकको मृत्यु भएको छ। दुधौली नगरपालिका ५ सिर्थौलीस्थित नयाँटोलबाट छपाहतर्फ जाँदै गरेको ना ५ त १९५१ नम्बरको ट्याक्टर शनिबार अनियन्त्रित भई दुर्घटना भएको हो।

दुर्घटनामा ट्याक्टरचालक दुधौली नगरपालिका- ५ छपाह सिर्थौलीका २१ वर्षीया बियसकुमार दनुवारको मृत्यु भएको जिल्ला प्रहरी कार्यालय सिन्धुलीका प्रवक्ता तथा प्रहरी नायव उपरिक्षक श्यामकुमार खत्रीले जानकारी दिए। उनका अनुसार दुर्घनामा गम्भीर घाइते भएका चालक दनुवारको सिन्धुली अस्पतालमा उपचारका क्रममा मृत्यु भएको हो।

‘दुर्घटनामा दनुवारको टाउको र छातीमा चोट लागेको थियो । उनको स्थानीय स्वास्थ्य संस्थामा उपचार सम्भव नभएपछि सिन्धुली अस्पतालमा उपचार गर्न ल्याएपनि उनलाई चिकित्सकले मृत घोषणा गरेका हुन्,’ उनले भने। उनको शव अहिले सिन्धुली अस्पतालमै राखिएको छ।