सप्तरी । नेपाली काँग्रेसका केन्द्रीय सदस्य तथा पूर्वमन्त्री बालकृष्ण खाँणले नेपाली काँग्रेसलाई सरकारमा जान हतार नरहेको बताएका छन् ।प्रेस युनियन रुपन्देहीले मंगलबार बुटवलमा आयोजना गरेको पत्रकार भेटघाट कार्यक्रममा खाँणले प्रदेश सरकारमा विभिन्न विकल्पहरुमाथि चर्चा हुन थालेकोतर्फ संकेत गर्दै काँग्रेसले अहिले सरकारका लागि दाबी नगरेको स्पष्ट पारे ।उनले भने, ‘तत्काल सरकारमा जान हतार छैन । तर काँग्रेसबिना सरकार बन्दै बन्दैन भनेचाहिँ जानुपर्छ, मुलकलाई सरकारविहीन बन्न पनि दिनु भएन ।’

उनले कुन पक्षसँग मिलेर सरकार जाने भन्नेचाहिँ खुलाएनन् । तर मुद्दा नमिल्ने पक्षसँग सहकार्य नहुने उनको भनाइ थियो । ‘अहिले नै यही हुन्छ भनेर सबै भन्न सकिँदैन तर जुन परिस्थिति आउँछ, त्यही अनुसार चल्नुपर्छ,’ उनले भने ।उनले प्रधानमन्त्री केपी शर्मा ओली सर्वसत्तावाद र अधिनायकवादको यात्रामा लागेको आरोपसमेत लगाए । प्रतिनिधि सभा विघटन गरी प्रधानमन्त्री ओलीले सर्वसत्तावाद लाद्न खोजेको उनको भनाइ थियो ।खाँणले संसद विघटन गर्ने प्रधानमन्त्रीको प्रस्तावलाई राष्ट्रपतिले विचारै नगरी स्वीकृत गर्नुले सर्वसत्तावाद हावी भएको बताए । ‘प्रधानमन्त्रीले सुरुदेखि नै संविधानको बर्खिलाप एकपछि अर्को काम गर्दै आएको उनले प्रस्ट पारे । मिडिया विधेयक, मानव अधिकार विधेयक, राष्ट्रिय अनुसन्धान विभाग, राजस्व अनुसन्धान विभाग आफ्नो सिधै नियन्त्रणमा राख्ने कामले नै प्रधानमन्त्रीको उद्देश्य प्रस्ट देखिएको उनको भनाइ थियो ।प्रधानमन्त्रीले संसद विघटनको प्रस्ताव राष्ट्रपतिकोमा लैजानु र विचारै नगरी राष्ट्रपतिबाट स्वीकृत हुनु असंवैधानिक कदम भएको बताउँदै उनले नेपाली काँग्रेसले संविधानको पक्षमा आवाज उठाउने बताए ।

संसदमा भ्रष्टाचारका मुद्दाहरुमा प्रश्न उठ्ने र जवाफ दिन सक्ने अवस्था नभएपछि संसद विघटन गरिएको उनको आरोप छ । आगामी वैशाखमा गर्ने भनिएको निर्वाचन पनि हुन सक्नेमा आशंका गर्दै उनले सरकार आफै निर्वाचन गराउने पक्षमा नरहेको टिप्पणी गरे ।