सर्लाही – महोत्तरीमा आइतबार दुई समूहबीच झडप हुँदा एकजनाको मृत्यु भएको छ। शनिबार राति अर्केस्ट्रा नाच हेर्ने क्रममा एक युवा कुटिएको निहुँमा आइतबार दुई समूहबीच झडप भएको हो। झडपमा ५० वर्षीय रामप्रसाद यादवको मृत्यु भएको छ।

कुटिएका युवाका अभिभावक र गाउँका अन्य व्यक्ति कुटपिट गर्नेको घरमा पुगेपछि दुई पक्षबीच झडप भएको थियो। झडपमा दुई जना घाइते भएका छन्। प्रहरीले घटनामा संलग्न दुई जनालाई नियन्त्रणमा लिएको छ। सोनमा गाउँपालिका–७ सुन्दरपुर मैनटोलमा शनिबार राति आयोजना गरिएको अर्केस्ट्रा नाच हेर्न पुगेका सोनमा गाउँपालिका-२ तरहारीनिवासी सरोज यादवलाई कुटपिट गरी उनको मोबाइल र अन्य सामान स्थानीय मलेठी सदाले खोसेको स्थानीय प्रत्यक्षदर्शीले बताए। सोही सामान लिन र आफ्नो भाइलाई किन कुटपिट गरेको भनी सोध्न गएका सरोजका दाइ मुकेश यादव र बुवा रामप्रसाद यादवसहित गएका गाउँलेलाई दर्जनौंको संख्यामा रहेका बिल्टु सदालगायत मैनटोलका बासिन्दाले कुटपिट गरेको स्थानीयले थाहाखबरसँग बताए।

कुटपिटबाट छोरासँगै पुगेका सरोज र मनोजका बुबा ५० वर्षीय रामप्रसाद यादव सिकिस्त भएका थिए। उपचारकै क्रममा गौशालास्थित स्वास्थ्य चौकीमा उनको मृत्यु भएको हो।