पर्सा – बाघको आक्रमणबाट पर्साको जिराभवानी गाउँपालिकामा एक जनाको मृत्यु भएको छ।

प्रहरीका अनुसार, बाघको आक्रमणबाट जिराभवानी गाउँपालिका-५, शंकर सखुवनियाका ५५ वर्षीय तुलसि राउत थारुको मृत्यु भएको हो। उनी शुक्रबार साँझ गाउँ नजिकैको जङ्गलमा घास काट्न गएका थिए।घास काट्न गएका उनी राति घर फर्किएनन्। स्थानीय बासिन्दाले शनिबार बिहानैदेखि खोजी थालेका थिए।

शंकरसरैयास्थित सुगिभार जंगल नजिकैको नर्सरीमा उनको शव फेला परेको ईलाका प्रहरी कार्यालय, पटेर्वा सुगौलीका प्रहरी निरीक्षक मोहन जंग बुढाथापाले बताए। उनको शव भेटिएपछि स्थानीय बासिन्दाले प्रहरीलाई खबर गरेका थिए।

उनको दायाँ खुट्टा र बाँया हात छैन। घाँटीमा बाघले कोतरेको घाउ रहेको प्रहरी निरीक्षक बुढाथापाले बताए।

घटनास्थलको जाँच मुचुल्कापछि शव पोस्टमार्टमका लागि वीरगञ्जस्थित नारायणी अस्पतालमा पठाउन लागिएको प्रहरीले जनाएको छ।