सप्तरी – महोत्तरीमा एकजना महिलाको शंकास्पद अवस्थामा मृत्यु भएको छ । मृत्यु हुनेमा महोत्तरीको जलेश्वर नगरपालिका – ८ रमौलकी २० वर्षीया रिना देवी राय छिन् ।

वैशाख १९ मा विवाह भएको रिनाको दाइजोको निहुमा हत्या गरिएको माइत पक्षले आरोप लगाएका छन् । माइतपक्षले दाइजोको निहुमा रिनाका श्रीमान रोहनकुमार राउतसहित ससुरा पक्षले मङ्गलवार राति १ बजे हत्या गरेको आरोप लगाएका हुन् ।

घरपरिवारले अचानक बिरामी भएर मृत्यु भएको जानकारी प्रहरी र माइत पक्षलाई दिएको थियो । प्रहरी पुग्दा घरको बरण्डामा रिनाको शव फेला परेको महोत्तरी प्रहरीले बताएको छ ।

प्रहरीका अनुसार पति रोहनले राति खाना खाएर सँगै सुतेको भन्दै रिना अचानक बिरामी भएपछि प्रादेशिक अस्पताल जलेश्वरमा उपचारको लागि लगेको र त्यहाँ मृत्यु भएपछि शव घर ल्याएको प्रहरीलाई बयान दिएका छन् ।

यता माइत पक्षले आफूहरू पुग्दा रिनाको मुखबाट रगत बगेको जस्तो र घाँटीमा निलडाम जस्तो देखिएकोले छोरीको हत्या भएको दाबी गरेको छ । रिना मङ्गलवार मात्रै माइतबाट ससुराली फर्किएकी थिइन् ।

मृतक रिनाको शव पोष्टमार्टमका लागि प्रादेशिक अस्पताल जनकपुरमा राखिएको छ । धनुषाको हंसपुर नगरपालिका–६ सोनिगामाकी रिनाको गत वैशाख १९ गते सामाजिक परम्परा अनुसार रोहनसँग भएको थियो । जसमा माइती पक्षले लत्ता, कपडा, भाडा बर्तन, फर्निचर, सुन, चाँदीका गहना तथा नगद गरी जम्मा १५ लाख खर्च गरेको बुबा नवल रायले बताए ।

विवाहको केही दिन दाम्पत्य जीवन राम्रै चलेपनि पछिल्लो समय थप दाइजो माइतबाट ल्याउन भनी छोरीलाई श्रीमान रोहनसहित घरपरिवारले निरन्तर झैझगडा, कुटपिट तथा यातना दिने गरेको बुबा नवलको भनाइ छ ।