अनवर अलि
काठमाण्डु,– उच्च अदालत पाटनले नक्कली भुटानी शरणार्थी प्रकरणमा पुर्पक्षका लागि थुनामा रहेका पूर्वगृहमन्त्री एवं काँग्रेस केन्द्रीय सदस्य बालकृष्ण खाणलाई धरौटीमा रिहा गर्न आदेश दिएको छ ।
न्यायाधीश कृष्णराम कोइरालाको एकल इजलासले बिहीबार खाणलाई धरौटीमा छाड्न आदेश दिएको हो ।
उच्च अदालत पाटनका रजिष्ट्रार ठगिन्द्र कट्टेलले दिएको जानकारी अनुसार खाँणसँग ३० लाख धरौटी माग गरिएको छ ।
यसअघि गत १५ मंसिरमा उच्च अदालतका न्यायाधीशहरू प्रकाश खरेल र जनक पाण्डेबीच राय बाझिएपछि तेश्रो न्यायाधीशको इजलासमा बिहीबार सुनुवाई भएको हो । पाण्डेय धरौटीमा रिहा गर्नुपर्ने पक्षमा र खरेल थुनामै राद्यनुपर्ने पक्षमा उभिएका थिए ।
न्यायाधीश कोइरालाले न्यायाधीश पाण्डेको रायसँग सहमति जनाउँदै खाणलाई धरौटीमा छाड्न आदेश दिएका छन् । संगठित अपराध मुद्धामा खाँणसहित २० जनाविरुद्ध गत १० जेठमा काठमाण्डु जिल्ला अदालतमा मुद्दा दर्ता भएको थियो ।
सोही मुद्धामा खरेल र पाण्डेको इजलासले भुटानी शरणार्थी नेता टेकनाथ रिजालसहित तत्कालीन हज समितिका अध्यक्ष शमशेर मियाँ, खाणका स्वकीय सचिव नरेन्द्र केसी, एमाले नेता टोप बहादुर रायमाझीका छोरा सन्दीप, हरिभक्त महर्जन र रामशरण केसीलाई धरौटीमा छाड्न आदेश दिएको थियो ।
यस्तै लक्ष्मी महर्जन, टंक गुरूङ, केशव तुलाधर र आशिष बुढाथोकी अदालतको आदेशमा साधारण तारेखमा रिहा भएका थिए । १५ लाख धरौटी रकम बुझाउन नसकेपछि नेता रिजाल भने थुनामै छन् ।
उच्चले एमाले सचिव रायमाझी, आङटावा शेर्पा, पूर्वसचिव टेकनारायण पाण्डे, सानु भण्डारी, केशव दुलाल, इन्द्रजित राई, सागर राई, गोविन्द चौधरी, सन्देश शर्मा आचार्य र आङटावा शेर्पालाई पुर्पक्षका लागि थुनामै राख्न आदेश दिएको थियो ।
१.
२.
३.
४.
५.
६.