नेकपा माओवादी केन्द्रबाट गाउँपालिकाको अध्यक्षमा उम्मेदवारी दिएका एक नेता नेकपा एमालेमा प्रवेश गरेका छन्। रसुवाको गोसाइँकुण्ड गाउँपालिकामा माओवादी केन्द्रबाट अध्यक्षको उम्मेदवार बनेका तेन्जिङ छेसाङ तामाङ बिहिबार एमालेमा प्रवेश गरेका हुन्।

माओवादीको गाउँपालिका इन्चार्ज समेतरहेका उनले वैशाख ३० गते हुने स्थानीय तहको निर्वाचनका लागि माओवादी केन्द्रबाट उम्मेदवारी दर्ता गराएका थिए। यस्तै नेकपा माओवादी केन्द्र रसुवाका जिल्ला कमिटी कान्छा तामाङ र नेकपा माओवादी केन्द्र रसुवाकै गोसाईकुण्ड गाउँपालिका वडा नं. ५ का वडा अध्यक्षका उम्मेदवार छोङी तामाङ पनि एमालेमा प्रवेश गरेको गोसाइकुण्ड गाउँपालिकाका निवर्तमान अध्यक्ष एवं एमालेबाट अध्यक्षका उम्मेदवार कैसाङ नुर्बु तामाङले जानकारी दिए।