जिल्लाको मकालु गाउँपालिकाका अध्यक्ष तेजबहादुर पोख्रेलले नेकपा एमालेको साधारण सदस्यसमेत नरहने गरी पार्टी परित्याग गरेका छन् ।

उनले बिहिबार प्रेस विज्ञप्ति जारी गर्दै पार्टीभित्र गुटगत नेताको आचरणले गर्दा आफ्नो पार्टीप्रतिको योगदानको अवमूल्यन भएको आरोप लगाएका छन् ।

उनी २०७६ सालको उपचुनावमा नेकपाबाट गाउँपालिका अध्यक्षमा निर्वाचित भएका थिए । पार्टी विघटनपछि भने नेकपा एमाले रोजेका थिए ।

एमालेमै बसेर राजनीति गर्न नसकिने भएकाले पार्टी परित्यागको घोषणा गर्नुपरेको उनले बताएका छन्।

उनले आउँदो वैशाख ३० हुने पालिका चुनावमा नेकपा एमालेको तर्फबाट पुनः गाउँपालिका अध्यक्षमा दाबी गर्दै आएका थिए। पार्टीले टिकट नदिएपछि रुष्ट भएका उनले पार्टी परित्यागको घोषणा गरेका हुन्।

पोख्रेल नेकपा एमाले सङ्खुवासभाका जिल्ला कमिटी सदस्यसमेत हुन्।