सिराहा – सिराहामा श्रीमतीको हत्या गरेको आरोपमा श्रीमान पक्राउ परेका छन् । प्रहरीले सिराहाको कर्जन्हा नगरपालिका ७ का २३ वर्षीय अमर राउतलाई २२ वर्षीया श्रीमती पुजा सिंहको हत्या गरेको आरोपमा पक्राउ गरेको हो ।

फेसबुकबाट चिनजान भएर प्रेममा परी अमरले गत माघमा पुजासँग मन्दिरमा विवाह गरेका थिए । पछि घर परिवारले अस्वीकार गरेपछि उनले श्रीमती पूजाको हत्या गरेको देखिएको सिराहाका प्रहरी नायव उपरीक्षक सुभाष बुढाथोकीले जानकारी दिए ।

उनकाअनुसार गत मंगलबार हत्या गरिएको अवस्थामा पुजाको शव फेला परेको थियो ।अनुसन्धानको क्रममा पुजाको हत्यामा अमरको संलग्नता रहेको देखिएपछि उनलाई शुक्रबार पक्राउ गरिएको प्रवक्ता बुढाथोकीले बताए ।अमरले गत माघ २७ गते काठमाडौंको भद्रकाली मन्दिरमा विवाह गरेको प्रहरीले जनाएको छ । विवाह गरेर दुवैजना काठमाडौं बाफलमा कोठा भाडामा लिएर बस्दै आएका थिए ।

प्रहरीकाअनुसार पुजासँगको विहेलाई परिवारले अस्वीकार गरेपछि उनी परिवारलाई मनाउन घर आएका थिए । तर, घर आएर अमर काठमाडौं नफर्किएपछि पुजा फागुन १६ गते उनलाई खोज्दै सिराहा पुगेकी थिइन् । पुजाले श्रीमानलाई आफू आएको जानकारी गराइन् । तर, अमरले आफू बाहिर रहेकाले साँझमा लिन आउने आश्वासन दिएका थिए ।

अमरले पुजा आफूलाई खोज्दा खोज्दै आएपछि आफ्नो साथीहरूसँग सल्लाह गरेर हत्या गरेको अनुसन्धानमा देखिएको प्रहरीको दाबी छ ।