काठमाडौं – आफ्नै श्रीमतीलाई भारतको कोठीमा लगेर बेचेको आरोपमा ती महिलाका श्रीमानसहित दुई जनालाई प्रहरीले पक्राउ गरेको छ।

पक्राउ पर्ने पीडित महिलाका श्रीमान र अर्का नुवाकोटको दुप्चेश्वर गाउँपालिका–१ का पासाङ तामाङ छन्। उनीहरुलाई मानव बेचबिखन अनुसन्धान ब्यूरोको टोलीले पक्राउ गरेको हो।पाँच वटा छोराछोरी समेत भएकी श्रीमतीलाई श्रीमानले २०७१ सालमा १ लाख ६० हजार रुपैयाँ लिएर पासाङ तामााङको जिम्मा लगाएका थिए। पासाङले बालाजुको होटलमा काम लगाइदिने भन्दै एक महिलालाई ती महिलाको जिम्मा लगाएका थिए। पासाङबाट जिम्मा लिएकी महिलाले पीडित महिलालाई होटलमा काम लगाइदिने र मासिक १० हजार रुपैयाँ दिने बताएकी थिइन्। ती महिलाले पनि पीडित महिलालाई एक पुरुषमार्फत् भारत पुर्‍याएकी थिइन्।

भारतमा नयाँदिल्लीस्थित म्हेण्डो तामाङको घरमा पुर्‍याएर ३ दिनसम्म राखिएको थियो। त्यसपछि उनलाई आग्रामा लगेर एक कोठीमा ८ महिनासम्म बेश्यावृत्तिमा लगाइएको पाइएको छ।

पछि भारतस्थित नेपाली दूतावास र शक्ति समूहको सहयोगमा गत जेठ ३१ गते महिला नेपाल फर्केकी थिइन्। पक्राउ परेकामाथि प्रहरीले अनुसन्धान सुरु गरेको छ।