प्रहरी बनाइदिन्छु भन्दै ठगी गर्ने १ जना व्यक्ति पक्राउ परेका छन् ।

हाल प्रहरी जवान पदको सम्पूर्ण परीक्षा समाप्त भएको अवस्थामा प्रहरी बनाइदिन्छु भन्दै ठगी गर्ने १ जना व्यक्तिलाई प्रहरीले कैलालीको धनगढी चौराहाबाट पक्राउ गरेको हो ।

जिल्ला प्रहरी कार्यालय कैलालीका प्रहरी उपरीक्षक (एसपी) विश्व अधिकारीले बझाङको मष्टा गाउँपालिका–२ का २५ वर्षीय मनोजकुमार सिंहले ठगी गरेको भेटिएपछि पक्राउ गरिएको बताए ।

बुधवार पक्राउ परेका सिंहले पीडितबाट ६० हजार रकम मागेका थिए । सिंहले रकम (घुस) नदिए प्रहरीको छनोटबाट फेल गरिदिने भन्दै धम्की समेत दिने गरेको प्रहरी उपरीक्षक अधिकारीले जानकारी दिए ।

सिंहमाथि ठगी मुद्दा दर्ता गरी अनुसन्धान अगाडि बढाइएको छ ।