काठमाडौँ – जनता समाजवादी पार्टी (जसपा) अध्यक्ष महन्थ ठाकुर पक्षका पाँच सांसद अर्का अध्यक्ष उपेन्द्र यादव समूहमा लागेका छन्।

अध्यक्ष ठाकुर पक्षका पाँच सांसद शनिबार यादव पक्षको बैठकमा सहभागी भएका छन्। प्रतिनिधि सभाका सांसदहरू अमृता अग्रहरी, नरमाया ढकाल, रानी मण्डल, प्रमोद साह र रूही नाज मिकरानीले ठाकुरको साथ छाडेका हुन।

जसपाका वरिष्ठ नेता राजेन्द्र महतोको नेतृत्वमा सरकारमा जाँदा मन्त्री बन्न नपाएकोमा उनीहरू असन्तुष्ट थिए। सांसद मिकरानीले भने आफू तटस्थ रहेको बताइन्। उनले हिमालखबरसँग भनिन्, “म पार्टी एकताको पक्षमा छु, म तटस्थ छु।”

पाँच सांसद थपिएपछि जसपा संसदीय दलमा उपेन्द्र यादव पक्षको बहुमत पुगेको छ। उनको पक्षमा १८ सांसद पुगेका छन्। जसमध्ये हरिनारायण रौनियर भने निलम्बित छन्।

अध्यक्ष यादव पक्षका एक नेताका अनुसार थप चार सांसद ठाकुर पक्ष छाड्ने भएका छन्। ति नेताले भने, “अझै चार सांसद हाम्रो पक्षमा आउन लागेका छन्।”