मकवानपुर – मकवानपुर प्रहरीले अवैध काठसहित ३ जनालाई पक्राउ गरेको छ । इलाका प्रहरी कार्यालय नेवारपानीबाट खटिएको टोलीले ५१.६० क्युफिट काठसहित ३ जनालाई प्रकाउ गरेको हो ।

हेटौंडा–१९, नेवारपानीस्थित पूर्व–पश्चिम राजमार्ग सडक खण्डमा मनहरीतर्फबाट हेटौंडातर्फ आउँदै गरेको ना.४ ख ५५०१ नम्बरको टिपरलाई रोकी जाँच गर्दा लुकाएर ल्याएको अवैध सालको काठ फेला परेको जिल्ला प्रहरी कार्यालय मकवानपुरले जनाएको छ ।

काठसहित मनहरी गाउँपालिका–७, बिजौनाका २५ वर्षीय बाबुलाल मोक्तान, २६ वर्षीय राजु प्रजा र निशान प्रजालाई नियन्त्रणमा लिएर आवश्यक कारवाहीको लागि डिभिजन वन कार्यालय राप्ती मनहरी पठाइएको जिल्ला प्रहरी कार्यालय मकवानपुरका प्रहरी प्रमुख उपरीक्षक सोमेन्द्रसिं राठौरले जानकारी दिए ।