दैलेख – दुल्लु नगरपालिका–२ नाउलेकटुवालस्थित वडापोखरामा एकै परिवारका सबै सदस्य कोरोना संक्रमित भएका छन्।

उक्त घरका ३८ वर्षीय व्यक्तिको भारतमा कोरोना संक्रमित भई जन्मथलो फर्केपछि हालै ज्यान गएको थियो। उनका ३५ वर्षीया श्रीमती, १३ र १४ वर्षका छोराहरू, तीन जना हजुरबुवा, दुई काका र एक छिमेकीसहित नौ जनालाई कोरोना लागेको हो। ती पुरुषका परिवार र छिमेकीसहित २५ जनाको शुक्रबार एन्टिजेन परीक्षण गर्दा नौ जनामा कोरोना संक्रमण पुष्टि भएको दुल्लु नगरपालिकाका मेयर घनश्याम भण्डारीले बताए। भारतमा कोरोना संक्रमण भएको तर ढाँटेर अघिल्लो साता गाउँ फर्किएका ती पुरुषको दुल्लु अस्पतालमा निधन भएको थियो। ती पुरुषले घरपरिवार र अस्पताललाई आफू भारतमै कोरोना संक्रमित भएकाबारे बताएका थिएनन्। परिवारका सदस्यले घरबाट अस्पतालसम्म पुर्‍याएका थिए। दुल्लुमा उपचार सम्भव नभएपछि उनलाई थप उपचारका लागि सुर्खेत रिफर गरिएको थियो।

तर, परिवारले सुर्खेत लैजान नपाउँदै उनको मृत्यु भएको थियो। आफन्त र परिवारले उनको शव घर पुर्‍याएका थिए। उनलाई कोरोना पुष्टि भएको थाहा पाएपछि मात्र परिवार, छिमेकी र आफन्त सशंकित बनेका थिए।