सोलुखुम्बु – हिमाली जिल्ला सोलुखुम्बुमा रेडपाण्डाको सात वटा छाला सहित तीन जनालाई पक्राउ गरिएको छ ।

मकालु बरुण राष्ट्रिय निकुञ्ज मध्वर्ती क्षेत्र बफर जोनभित्र दुर्लभ बन्यजन्तु रेड पाण्डा शिकार गर्ने महाकुलुङ गाउँपालिकाका तीन जनालाई प्रहरीले नियन्त्रणमा लिएर सार्वजनिक गरेको हो ।जिल्ला प्रहरी कार्यालयबाट खटिएको प्रहरी निरीक्षक मन्दिप चौहानको टोलीले महाकुलुङ २ बस्ने ७६ बर्षिय जगतबहादुर राई, वडा नम्बर ३ बस्ने ५७ बर्षिय मितुरधन राई र ५६ बर्षिया कविर शंखर राईलाई उनीहरुका घरैबाट पक्राउ गरेको हो ।

अभियुक्तहरुको साथबाट रेड पाण्डाको सात थान छाला र रेड पाण्डा मार्न प्रयोग गरिने पाँच थान पासो बरामद गरिएको प्रहरीले जनाएको छ ।उनीहरुलाई कानुनी कारबाहीको लागि मकालु बरुण राष्ट्रिय निकुञ्ज पठाइने प्रहरी नायब उपरीक्षक कवित कटुवालले जानकारी दिनुभयो ।रेडपाण्डाको चोरी शिकारी र तस्करीमा ठूलै गिरोह संलग्न रहेको तथा चीन र बर्मासम्म तस्करी हुने गरेको तथ्य फेला परेको पनि डिएसपि कटवालले बताउनुभयो ।

अभियुक्तहरुलाई राष्ट्रिय निकुन्ज तथा बन्यजन्तु संरक्षण ऐन २०२९ को दफा २६ को १ अनुसार पाँच लाख रुपियाँदेखि दश लाख रुपैयाँसम्म जरिवाना वा ५ बर्षदेखि १५ बर्षसम्म कैद वा दुवै सजाय हुनसक्ने छ ।