बैंकमा पर्याप्त रकम नभएको जानीजानी खाली चेक काटेर दिने विजय कुमार श्रेष्ठलाई प्रहरीले पक्राउ गरेको छ ।

अदालतले बैंकिङ कसूर मुद्दा फैसला सुनाए पनि फरार रहेका काठमाडौं महानगरपालिका १६ बस्ने तार्केश्वर नगरपालिका ३ जितपुर फेदी घर भएका ५७ वर्षीय श्रेष्ठलाई प्रहरीले पक्राउ गरेको जनाएको हो । उच्च अदालत पाटनको २०७७ माघ २ गतेको फैसलाले बैंकिङ कसूर मुद्दामा ३ दिन कैद र विगो बमोजिम ९ लाख ५० हजार रुपैयाँ जरिवाना ठहर भई फरार रहेका उनलाई प्रहरीले काठमाडौं काभ्रेस्थलीमा लुकीछिपी बसिरहेको अवस्थामा फेला पारी पक्राउ गरेको हो ।

विजय कुमारले २०७७ असार १५ गते आफ्नो खातामा पर्याप्त मौज्दात रकम नभएको भन्ने जानी जानी झुक्यानमा पारी कुमारी बैंक लिमिटेड, शाखा कार्यालय गोंगबुमा रहेको उनकै खाताबाट भुक्तान हुने गरी चेक काटी पीडितलाई दिएको घटनामा बैंकिङ कसूरजन्य अपराध ठहर गरी उच्च अदालत पाटनले उक्त कैद तथा विगो बमोजिम उक्त रुपैयाँ जरिवाना ठहर गरेको थियो ।

उनलाई फैसला कार्यान्वयनको लागि काठमाडौं जिल्ला अदालतमा पेश गरिएको उक्त व्यूरोले जनाएको छ ।