भक्तपुरको सूर्यविनायकमा रहेको गणेश बाल विकास स्कुलका सुरक्षा गार्ड मृत फेला परेका छन् ।

सिन्धुपाल्चोक पाँचपोखरी गाउँपालिका–५ घर भई सूर्यविनायक महत गाउँ बस्ने ४५ वर्षीय साइँला श्रेष्ठ भन्ने लक्ष्मीदास श्रेष्ठ मृत फेला परेका हुन् । स्कुल नजिकैको खोल्सामा बिहीबार बिहान पौने ८ बजे उनको शव फेला परेको प्रहरीले जानकारी दिएको छ ।

महानगरीय प्रहरी वृत्त, जगातीबाट खटिएको प्रहरीको टोलीले उनको शव खोल्सामा घोप्टो परेको अवस्थामा फेला पारेको थियो । उनी दिउँसो ज्याला मजदुरीको काम गर्ने र राति गणेश बाल विकास स्कुलमा सुरक्षा गार्डको काम गर्ने गरेको प्रहरीको भनाइ छ ।

प्रहरीको प्रारम्भिक अनुसन्धानबाट उनले मापसे गरेको थाहा भएको र आफैँ लडेर मृत्यु भएको देखिएको छ ।
उनको शव पोष्टमार्टमका लागि काठमाडौं मेडिकल कलेज दुवाकोट पठाइएको प्रहरीले जनाएको छ ।