काठमाडौं – पश्चिम-मध्य बंगालको खाडीमा विकसित भएको ‘अर्णव’ नामक चक्रवात थप तीव्र बन्दै ‘अत्यन्त शक्तिशाली चक्रवाती आँधी’ मा परिणत भएको छ। भारतीय मौसम विज्ञान विभाग (आईएमडी) का अनुसार उत्तर-पश्चिमतर्फ अघि बढिरहेको यो आँधी बुधबार दिउँसोसम्ममा बापटला र विशाखापट्टनमको बीचमा पर्ने यानम नजिकैबाट आन्ध्र प्रदेश तथा यानमको तटीय क्षेत्र पार गर्ने प्रबल सम्भावना रहेको छ। तटीय क्षेत्र पार गर्दा आँधीको गति प्रतिघण्टा ११५ देखि १२५ किलोमिटर र अधिकतम गति १४० किलोमिटरसम्म पुग्न सक्ने अनुमान गरिएको छ। हाल विशाखापट्टनमबाट करिब ३०० किलोमिटर, काकिनाडाबाट ३६० किलोमिटर, मछलीपट्टनमबाट ४६० किलोमिटर र बापटलाबाट ५३० किलोमिटर टाढा केन्द्रित यो आँधीले उत्तर-पश्चिमतर्फ मोडिएर आन्ध्र प्रदेशको तट पार गर्नेछ।

चक्रवातको प्रभावका कारण तटीय आन्ध्र प्रदेश र यानममा मंगलबार र बुधबार, ओडिसामा बुधबार, छत्तीसगढमा बुधबार र बिहीबार तथा पूर्वी उत्तर प्रदेशमा बिहीबार भारीदेखि धेरै भारी वर्षा हुने चेतावनी जारी गरिएको छ। उत्तर प्रदेशका चित्रकूट, कौशाम्बी, प्रयागराज, फतेहपुर, प्रतापगढ, रायबरेली, अमेठी र सुल्तानपुरलगायतका जिल्लाहरूमा वर्षाको सम्भावना रहेको छ भने समाचार एजेन्सी पीटीआईका अनुसार शुक्रबार बरेली, पिलिभित, शाहजहाँपुरसहित पूर्वाञ्चल, अवध र तराई क्षेत्रका विभिन्न स्थानमा वर्षासँगै तीव्र हावाहुरी चल्नेछ। यसको प्रभावले गर्दा त्यहाँको दिउँसोको तापक्रम ५ देखि ८ डिग्री सेल्सियससम्म घट्ने प्रक्षेपण गरिएको छ।

चक्रवातको उच्च जोखिमलाई मध्यनजर गर्दै पूर्वसावधानीस्वरूप ‘साउथ कोस्ट रेलवे’ ले मंगलबार र बुधबारका लागि ५३ वटा रेल सेवाहरू रद्द गरेको छ र यात्रुहरूलाई स्टेसन जानुअघि यात्राको स्थिति यकिन गर्न आग्रह गरेको छ। समुद्रमा विकसित भएको चक्रवात जमिनमा प्रवेश गरेपछि कमजोर हुँदै जान सक्छ । तर यसले बोकेको जलवाष्प, पश्चिमी वायु प्रणालीसँगको अन्तरक्रिया र हिमालयको भौगोलिक बनावटका कारण नेपालमा समेत वर्षा गराउन सक्छ । त्यसैले मौसमी चिन्ता यहाँका पनि देखिएको हो ।

नेपालको जल तथा मौसम विज्ञान विभागले जारी गरेको बुलेटिनअनुसार कात्तिक १२ गतेदेखि केही प्रदेशमा वर्षा तथा उच्च पहाडी र हिमाली क्षेत्रमा हिमपातको सम्भावना छ । १३ र १४ गते केही स्थानमा भारी वर्षा तथा हिमपात हुन सक्ने पूर्वानुमान छ । त्यस्तै, अण्डमान र निकोबार प्रशासनले सबै विद्यालयहरू दुई दिनका लागि बन्द गर्ने निर्णय गर्नुका साथै बालबालिका तथा महिलाहरूको पोषण प्रभावित नहोस् भन्नका लागि लाभग्राहीको घरघरमै सुक्खा खाद्यान्न पुर्याउने व्यवस्था मिलाएको छ। यसैबीच, ओडिसा सरकारले सञ्चारमाध्यम तथा डिजिटल प्लेटफर्महरूका लागि एक निर्देशिका जारी गर्दै चक्रवातसँग सम्बन्धित झूटा, भ्रामक वा अनुमानमा आधारित प्रक्षेपण तथा चेतावनीहरू सम्प्रेषण नगर्न कडा आग्रह गरेको छ।