धनगढी – कैलालीको कैलारी गाउँपालिकाको एक बस्तीमा आगलागी भएको छ। कैलारी गाउँपालिका–७ विपतपुर (सुकुम्बासी) बस्तीमा आगो लागेको हो।

आगलागी अझै नियन्त्रणमा आइसकेको छैन। गहुँको नल ढडाउन लगाइएको आगो हावाले उडाएर बस्तीमा सल्केको बताइएको छ।

टीकापुर नगरपालिका र धनगढी उपमहानगरपालिकाबाट गएको दमकल, प्रहरी र स्थानीयले आगो नियन्त्रणको प्रयास गरिरहेका रामपुरका भलमन्सा रामलाल चौधरीले बताए।

कैलालीका प्रहरी प्रमुख प्रहरी उपरीक्षक सोमेन्द्र सिंह राठौरले आगलागीबाट भएको क्षतिको यकिन हुन नसकेको बताए।

‘अहिले म र सिडियो’साप घटनास्थलतर्फ गइरहेका छौं। धनगढी र टीकापुरको दमकल आगो नियन्त्रणको प्रयास गर्दैछन्, अन्य स्थानीय तहको दमकम पनि मगाइरहेका छौं,’ उनले भने।

आगलागीबाट अहिलेसम्म करिब ४० घर जलेको खबर प्राप्त भएको एसपी राठौरले बताए।