विराटनगरबाट तीन लाखभन्दा बढी अवैध भारतीय रुपैयाँ (भारु)सहित चार जनालाई प्रहरीले पक्राउ गरेको छ । पक्राउ पर्नेमा दुई जना भारतीय र दुई जना नेपाली नागरिक छन् । सुनसरी बर्जुकी एक जना महिला पनि पक्राउ परेकी छन् ।

स्रोत नखुलेको भारती नोटसहित भारतीय नागरिक ३७ वर्षीय अभिनास मुखिया, २९ वर्षीय विष्णुदेव मुखिया तथा सुनसरीको बर्जु गाउँपालिका–१ का ३८ वर्षीय सुरज ऋषिदेव र शिवकुमारी ऋषिदेव पक्राउ परेका हुन् ।

मोरङ प्रहरीका प्रवक्ता डिएसपी दीपक श्रेष्ठका अनुसार इलाका प्रहरी कार्यालय रानीको टोलीले चारै जनालाई विराटनगर महानगरपालिका–१५ बाट सोमबार पक्राउ गरेको हो । पक्राउ परेकाहरूको साथबाट स्रोत नखुलेको भारतीय तीन लाख आठ हजार पाँच सय रुपैयाँ बरामद भएको श्रेष्ठले बताए ।

उनका अनुसार पक्राउ परेकाहरूलाई प्रहरीले आवश्यक कारबाहीका लागि राजस्व अनुसन्धान कार्यालय इटहरी बुझाएको छ । पक्राउ परेकाहरूको साथबाट बरामद भएको रकमको कुनै पनि स्रोत नखुलेको प्रहरीले जनाएको छ ।