सप्तरी – ताप्लेजुङको सदरमुकाममा वन्यजन्तु देखिन थालेपछि सर्वसाधारण आतंकित भएका छन् । हिजो दिउँसो फुङलिङ २ को तारेबुङ,पारिभित्ता जंगल (सौरेबरालको घर छेउ) को सानो जंगलको बाँसघारीमा कालोभालु देखिएको हो । स्थानीय धर्म पौडेलले छरछिमेक तथा जनप्रतिनिधिहरुलाई भालु देखिएपछि खबर गरेका थिए ।

पौडेलका अनुसार मदन पौडेल र उनले गएर हेर्दा भालु त्यहिँ थियो । डरले उनीहरु भागेपछि भालु नजिकैको अम्रिसो बारीभित्र लुकेको स्थानीयले बताएका छन् ।

फुङ्लिङ २ का वडाध्यक्ष मोहन न्यौपानेका अनुसार गत फागुनदेखि गाउँघरमा जङ्गली जनावरहरु अत्यधिक देखिएको स्थानीयको गुनासो छ । विशेषगरी ताप्लेजुङमा घर नजिकै चितुवा,मृग,निगाले देखिएको खबर बारम्बार आउने गरेको न्यौपानेले बताए ।

यसअघि ताप्लेजुङ जिल्ला अस्पतालमा गत फागुन १९ गते साँझ भालु छिरेको थियो । त्यसपछि स्थानीयवासी थप आतंकित भएका थिए । चितवनबाट विज्ञ टोली झिकाएर चार दिनपछि अस्पतालको कोठामा थुनिएको भालुको सकुशल उध्दार गरी बासस्थानतर्फ फर्काइएको थियो ।