सप्तरी – नेकपा एमालेका नेता गोकुल बाँस्कोटाले अमेरिकी सहयोग नियोग मिलेनियम च्यालेन्ज कर्पाेरेसन (एमसीसी) सँग नेपालले गरेको सम्झौता संसदबाट अनुमोदन गर्नेबारे प्रमुख प्रतिपक्षी एमाले नबोलेको भन्नेहरूप्रति आक्रोश पोखेका छन्।

एमाले बोलेन भनेर अरुले भनिरहन आवश्यक नभएको उल्लेख गर्दै पूर्वसञ्चारमन्त्री समेत रहेका बाँस्काेटाले दबाब र प्रभावभन्दा परै बसेर कदम चाल्ने पार्टी नै एमाले भएको दाबी गरेका छन्।

‘अधिक फेक र पेड गरिएका ओभरलोडेड सूचनाको बाढीले नेपाली समाजलाई नराम्ररी थिच्ने भो। समाधानबिनानाको उग्रताले कहीँ पनि पुर्याउॅंदैन’, शनिबार बिहान सामाजिक सञ्जालमार्फत बाँस्कोटाले आक्रोश पोखेका छन्, ‘फलानो बोल्यो, तिलानो बोल्यो, एमाले बोलेन भनेर अरुले गीत गाउन आवश्यक छैन। दबाब र प्रभावभन्दा परै बसेर सुदूर भविष्यसम्म हेरेर कदम चाल्ने पार्टी नै एमाले हो।’