पर्वत – महिलालाई प्रलोभनमा पारी तथा डर त्रास समेत देखाई यौनधन्दामा लगाएको आरोपमा पोखराबाट दुई जना पक्राउ परेका छन्।

जिल्ला प्रहरी कास्कीका सूचना अधिकारी प्रहरी नायब उपरीक्षक सुवास हमालका अनुसार तनहुँको आबुखैरेनी गाउँपालिका–२ घर भई हाल कास्कीको पोखरा महानगरपालिका–८ जाल्पारोडमा बस्दै आएका २६ वर्षीय अर्जुन पन्त र गोरखाको गण्डकी गाउँपालिका–७ घ्यालचोक घर भई हाल पोखरा महानगरपालिका–१४ चाउथेमा बस्दै आएका २४ वर्षीय विराज राना मगरलाई प्रहरीले नियन्त्रणमा लिएको छ। उनीहरूले पोखरा–८ जाल्पारोडमा रहेको संगिना खाजा घरमा महिलाहरूलाई यौनधन्दामा लगाउने गरेको प्रहरीले बताएको छ। यसबारे सूचना पाएपछि वडा प्रहरी कार्यालय बैदामबाट खटिएको प्रहरी टोलीले अर्जुन र विराजले एक महिलालाई मोटरसाइकलमा राखेर लैजाँदै गरेको अवस्थामा नियन्त्रणमा लिइएको प्रहरी नायब उपरीक्षक हमालले जनाकारी दिए। ती महिलालाई भने आफन्तको जिम्मा लगाई पठाइएको छ।

होटेलका सञ्चालक समेत रहेका पन्त र आरोपी मगरलाई मानव बेचबिखन तथा ओसारपसार मुद्दामा कास्की जिल्ला अदालतबाट १० दिनको म्याद थप गरेर अनुसन्धान भइरहेको डिएसपी हमालले बताए।