सप्तरी – सिरहामा गोली हानी सुनचाँदी व्यवसायीको हत्या भएको छ ।

शनिबार राति करिब पौने १ बजेको समया लहान नगरपालिका–२३ गढिया चौकमा रहेको सुनचाँदी पसलमा लुटपाट गर्न आएको समूहले वडा नम्बर २२ सिसबोनिका ४५ प्रदीप मिझारको गोली हानी हत्या गरेको सिरहाका प्रहरी प्रवक्ता प्रहरी नायव उपरीक्षक शालिग्राम शर्माले जानकारी दिए ।मिझारकी श्रीमती अन्दाजी ३५ वर्षीया अनिता कुमारी दुलाल समेत घाइते भएको र उनको उपचार लहान स्थित सप्तऋषि अस्पतालमा भइरहेको प्रहरीले जनाएको छ ।
आक्रमणकारीहरु मिझार दम्पति सुनचाँदी पसल सञ्चालन गरि बसेको घरको पछाडि पट्टिको भागबाट भ¥याङ्ग लगाएर घरको छतमा चढेर भुईँ तल्लामा झरेका थिए ।फलामको हम्मर र फलामको छिनोले ढोका फोरेर भित्र प्रवेश गरेको ६–७ जनाको समूहले चोरी तथा लुटपाट गर्न लाग्दा त्यसको प्रतिकार गरेका मिझारको हत्या भएको हो । चोरहरुको समूहले मिझारको टाउको, अनुहार र हातमा खुकुरीले प्रहार गरि छातीमा गोली प्रहार गरेको प्रहरीले जनाएको छ । गम्भीर घाइते भएका मिझारको उपचारको क्रममा आइतबार बिहान साढे ४ बजे मृत्यु भएको हो ।

घटनामा संलग्न रहेको अभियोगमा प्रहरीले दुईजनालाई नियन्त्रणमा लिएको छ । लहान नगरपालिका वडा नं. ७ का २६ वर्षीय रामकृष्ण चौधरीलाई घटना स्थलबाटै फलामको छिनोसहित नियन्त्रणमा लिएको प्रहरी प्रवक्ता शर्माले जानकारी दिए ।

त्यस्तै लहान नगरपालिका वडा नं. २३ गढियाका २९ वर्षीय सूर्य सहनीलाई समेत पक्राउ गरिएको सिरहा प्रहरीले जनाएको छ । घटना सम्बन्धमा थप अनुसन्धान भइरहेको प्रवक्ता शर्माले जानकारी दिएका छन् ।