सप्तरी – नेपाल टेलिकमले फिचर फोनहरुमा समेत फोरजीमा आधारित एचडी भ्वाइस सेवा परीक्षण गर्ने भएको छ । टेलिकमले फोरजीमा आधारित भ्वाइस ओभर लङ टर्म इभोलुसन (भ्वाइस ओभर एलटीई) सेवा फिचर फोनमा परीक्षणका लागि प्रक्रिया अघि बढाएको हो ।

त्यसका लागि कम्पनीले इच्छुक मोबाइल ब्राण्डहरुलाई परीक्षणमा सहभागी हुन आग्रह गर्दै टेण्डर जारी गरेको छ । आइतबार गोरखापत्रमा टेण्डरका लागि सार्वजनिक सूचना जारी गर्दै टेलिकमले फोन आपूर्तिकर्ताहरुलाई जीएसएम फिचर फोन उपलब्ध गराउनुपर्ने जनाएको हो ।टेलिकमले हाल देशभर विस्तार गरिरहेको फोरजी एलटीई परियोजना अन्तर्गत एचडी भ्वाइस सेवाको परीक्षणलाई समेत अघि बढाएको छ । केही दिन अघिमात्रै टेलिकमले फोरजी ब्याण्ड ३ (१८०० मेगाहर्ज), ब्याण्ड २० (८०० मेगाहर्ज) र भीओएलटीई सम्बन्धी प्राविधिक परीक्षणका लागि स्मार्टफोन आपूर्तिकर्ता तथा बिक्रेतालाई कार्यालयमा सम्पर्क गर्न आग्रह गरेको थियो ।स्मार्टफोनका साथ फिचर फोनमा पनि यो सेवाको परीक्षणका लागि सार्वजनिक टेण्डर जारी गरिएको कम्पनीले जनाएको छ । कम्पनीका अनुसार परीक्षण पश्चात फोरजी एलटीई तथा भ्वाइस ओभर एलटीई सेवा सपोर्ट गर्ने मोबाइल सेटको मोडल टेलिकमको वेबसाइटमा राखिने उल्लेख छ ।कम्पनीका अनुसार हालको फोरजी सेवामा इन्टरनेट डेटा मात्रै चल्ने गरेको छ भने भ्वाइस कलका लागि थ्रीजीमै फलब्याक हुनेगर्छ । तर अब भिओएलटीईमा भने भ्वाइस कल समेत फोरजीमै चल्नेछ ।

यसको मतलव अब भ्वाइस कल समेत फोरजी इन्टरनेटमै हुनेछ । भिओएलटीईमा हालको थ्रीजीको तुलनामा गुणात्मक रुपमा नै उच्च गुणस्तरमा अर्थात प्राकृतिक आवाजमै कुराकानी गर्न सकिने टेलिकमले जनाएको छ ।फिचर फोनको हकमा गुणस्तरमा अर्थात प्राकृतिक आवाजका लागि परीक्षण गर्न लागिएको हो ।