काठमाडौँ – नेपालमा जारी यू–२० साफ च्याम्पियनसिप फुटबलको दोस्रो सेमिफाइनल खेलमा आज भारत र बंगलादेश खेल्दै छन् ।

यी दुई टोलीबीचको खेल सातदोबोटोस्थित एन्फा कम्प्लेक्समा दिउँसो ३ बजे सुरु हुनेछ । आजको विजेताले उपाधिका लागि बुधबार नेपालको सामना गर्नेछ ।

शनिबार भएको पहिलो सेमिफाइनल खेलमा भुटानविरुद्ध टाइब्रेकरमा जित निकाल्दै नेपाल फाइनलमा पुगेको थियो । निर्धारित ९० मिनेटको समयमा एक–एक गोलको बराबरी भएपछि खेल टाइब्रेकरमा धकेलिएको थियो ।

टाइब्रेकरमा गोलकिपर जियारथ शेखको उत्कृष्ट प्रदर्शनमा नेपालले सात वर्षपछि उमेर समूहको साफको फाइनलमा स्थान बनायो ।