सुनसरीको कोसी गाउँपालिका–२ बाट प्रहरीले कटुवा पेस्तोल र लागुऔषधसहित एक जनालाई पक्राउ गरेको छ ।

सुनसरी प्रहरी प्रमुख एसपी सञ्जयसिंह थापाका अनुसार इटहरी उपमहानगरपालिका–३ का १९ वर्षीय रोहित राईलाई पक्राउ गरिएको हो । विशेष सूचनाका आधारमा खटिएको प्रहरी टोलीले राईलाई पेस्तोल, गोलीको खोका तथा लागुऔषध डाइजापाम र नाइट्रोसन १०/१० एम्पुल एवम् लुपिजेसिक तीन एम्पुल र ट्रामाडोल ३,३७५ पिससहित पक्राउ गरेको थापाले बताए ।

पक्राउ परेकाविरुद्ध हातहतियार खरखजना र लागुऔषध ऐनअन्तर्गतको मुद्दा चलाउन प्रहरीले बिहीबार अदालतबाट म्याद थप गरेर घटनाको बाँकी अनुसन्धान अघि बढाएको छ । राईले भारतबाट हतियार र लागुऔषध लिएर आएको हुनसक्ने प्रहरीको अनुमान छ ।