विराटनगर – मोरङको रंगेलीमा मतगणना पुनः स्थगित भएको छ । वडा नं. ७ मा गणनाका क्रममा खसेकोभन्दा धेरै मत फेला परेपछि गणना रोकिएको हो ।

मतगणनाका क्रममा १०७ सात मत बढी भेटिएको र अहिले सबैतिरको गणना स्थगित भएको नेपाली कांग्रेसका नगरप्रमुख पदका उमेदवार मोदराज घिमिरेले बताए ।

उनकाअनुसार रंगेलीको वडा नं ७ को २,१३३ मतगणना भइसकेको थियो । गन्न बाँकी १,२१६ थियो । तर, ३,२४२ मत खसेकोमा जम्मा मत ३३४९ मत भेटिएपछि सबैतिरको गणना बन्द भएको घिमिरे बताए ।

यसअघि वडा नं. ८ को मतपेटिका फुटेको अवस्थामा फेला परेपछि गठबन्धन दलको विरोधका कारण तीन दिन गणना स्थगित भएको थियो ।

प्रमुख निर्वाचन आयुक्त दिनेशकुमार थपलिया आफैँ रंगेली पुगेर दलहरुसँग छलफल गरी विवाद मिलाएपछि गणना शुरु भएको थियो ।