यस वर्ष हिमाल आरोहणका क्रममा ४ जनाको मृत्यु भएको छ । विभिन्न मितिमा हिमाल आरोहण गर्न गएकाहरुको मृत्यु भएको पर्यटन विभागका निर्देशक सूर्यप्रसाद उपाध्यायले जानकारी दिए ।

उनका अनुसार सगरमाथामा एक नेपाली सहयोगी र एक विदशी आरोहीको मृत्यु भएको हो । त्यस्तै कञ्चनजंघामा एक भारतीय र धौलागिरिमा एक नेपाली सहयोगीको मृत्यु भएको छ ।

उनीहरुको मृत्युबारे विस्तृत विवरण आइनसकेको उपाध्यायले बताए । यद्यपि संख्यात्मक हिसाबले यसवर्ष विगतमा भन्दा कम मानवीय क्षति भएको हो ।

‘यो वर्ष हिमालमा तुलनात्मक रुपमा कम मानवीय क्षति भएको छ,’ निर्देशक उपाध्यायले भने, ‘यसो हुनुमा फटाफट आरोहण हुनु र मौसमले पनि साथ दिनु हो ।’ यस वर्ष आरोहीहरुका लागि मौसम अनुकुल नै देखिएको उपाध्यायले बताए ।

उनका अनुसार अहिलेसम्म ८० प्रतिशत आरोहण दलको अभियान सकिएको छ । केही टोली काठमाडौं फर्किएर पर्यटन विभागमा ब्रिफिङसमेत सकेका छन् । केही टोली भने आरोहणकै सिलसिलामा छन् ।

यो वर्ष कुल १ सय २३ समूहका ९ सय ६८ जना आरोहीले हिमाल चढ्न अनुमति लिएका थिए । यसमध्ये ७ सय ५८ जना पुरुष र २ सय १० जना महिला थिए ।

यो वर्ष कुल २७ वटा हिमालमा आरोहण अनुमति जारी भएको थियो । यसमध्ये सगरमाथामा मात्र ४२ समूहका ३ सय १९ जनाले अनुमति लिएका थिए ।

पर्यटन विभागका अनुसार यो सिजनमा सरकारले ४८ करोड रुपैयाँ रोयल्टी संकलन गर्न सफल भएको छ । जसमध्ये सबैभन्दा धेरै ३९ करोड ९५ लाख रुपैयाँ रोयल्टी सगरमाथाबाट उठेको छ ।

ल्होत्से हिमालबाट दुई करोड ८४ लाख र कंचनजंगा हिमालबाट एक करोड ३० लाख रुपैयाँ रोयल्टी उठेको छ ।