राष्ट्रिय प्रजातन्त्र पार्टीले देशका विभिन्न स्थानमा नेकपा एमाले र नेकपा माओवादी केन्द्रका कार्यकर्ताले आक्रमण गरेको जनाएको छ।राप्रपा प्रवक्ता मोहन श्रेष्ठका अनुसार धनुषा र रुकुम पश्चिममा राप्रपा कार्यकर्तामाथि आक्रमण भएको हो।

धनुषाको सबैला नगरपालिका-४ मा राप्रपाका वडा सदस्यका उमेदवार समशुल राइन मिया माथि एमाले कार्यकर्ताले आक्रमण गरेको उनले बताएका छन्।घरदैलो गरिरहेका बेलामियामाथि एमाले कार्यकर्ताले उम्मेदवारी फिर्ता लिन दबाब दिएका थिए। तर मियाले पछि नहट्ने अडान लिएपछि उनी र उनको ७ जना परिवारका सदस्यमाथि आक्रमण भएको श्रेष्ठले बताए।राप्रपाले घटनामा संलग्नलाई पक्राउ गर्न र घाइतेको उपचारको व्यवस्था मिलाउन माग गरेको छ।

यस्तै रुकुम पश्चिमको मुसिकोट नगरपालिका-१ मा राप्रपाबाट वडाअध्यक्ष पदका उमेदवार लिलिवीर बिसीको चुनाव प्रचारका क्रममा माओवादीले बाटो छेकेर आक्रमण गरेको उनले बताए।त्यहाँ झण्डा च्यातेर फालिदिने र उमेदवारलाई लछारपछार गरिएको घटना भएको श्रेष्ठले बताए।राप्रपाले आफ्नो चुनावी प्रतिबद्धतासहित घरदैलोमा पुगिरहेका राप्रपाका उम्मेदवारमाथिको आक्रमणले लोकतान्त्रिक अधिकारको उपहास भएको जनाएको छ।राप्रपाले भयरहित निर्वाचनको वातावरण बनाउन सरकार र निर्वाचन आयोगलाई आग्रह गरेको छ।A