पश्चिम म्याग्दीको मालिका गाउँपालिका–५ देवीस्थानको गाईखर्क भन्ने स्थानमा लगाइएको लागूऔषध अफिम खेती नष्ट गरिएको छ । शुक्रबार देवीस्थानस्थित गाईखर्कको सार्वजनिक स्थानमा झन्डै पाँच रोपनी जग्गाको लागूऔषध अफिमलाई प्रहरीले नष्ट गरिएको हो ।

गाईखर्कको स्थानमा लागूऔषध अफिमको खेती गरेको भन्ने गोप्य सूचनाको आधारमा अफिम खेतीलाई नष्ट गरिएको म्याग्दीका प्रहरी नायव उपरीक्षक (डीएसपी) तिलक भारतीले बताउनुभयो । गोप्य सूचनाको आधारमा इलाका प्रहरी कार्यालय दरबाङबाट प्रहरी निरीक्षक सागर पन्तको नेतृत्वमा खटिएर गएको म्यादी प्रहरीसहित २८ जनाको टोलीले लागूऔषध नष्ट गरेको उहाँको कथन छ ।

सार्वजनिक स्थानमा कसले अफिमको खेती गरेको हो भन्ने खुल्न बाँकी रहेकाले अनुसन्धान भइरहेको प्रहरीले जनाएको छ । प्रहरीको आफ्नै नियमित कार्यक्रम तथा आसन्न चुनावको सुरक्षालाई मध्यनजर गरी सार्वजनिक स्थानको लागूऔषध नष्ट गरिएको बताइएको छ । प्रहरीले आसन्न पालिका चुनावको समयमा हुन सक्ने अवाञ्छित गतिविधिलाई नियन्त्रण गर्न पनि सक्रियता बढाएको जनाएको छ ।

यसै गरी, जिल्लाको अन्य ठाउँमा पनि हुनसक्ने लागूऔषधको खेती तथा कारोबारलाई नियन्त्रण गर्न आवश्यक खोजीकार्य र अनुसन्धान भइरहेको डीसएपी भारतीले बताउनुभयो ।