अत्यधिक गतिमा सिन्धुलीबाट काठमाडौं आउँदै गरेको टाटासुमो काठमाडौंबाट भारततर्फ तीर्थयात्री लिएर जाँदै गरेको फोर्स गाडी एक–आपसमा जुद्धा पाँच जनाको निधन भएको छ ।

प्रहरीका अनुसार असीमित गतिका कारण अनियन्त्रित हुन पुगेको सुमो फोर्स गाडीमा गएर ठोक्किएको थियो । ‘सुमोका कारण फोर्स गाडीमा ठक्कर दिँदा सुमोमा सवार यात्रुहरुको निधन भएको छ, सुमोमा सवार पाँच यात्रुमध्ये चालक र आमाछोरासमेत छन्’, प्रहरी प्रवक्ता डीएसपी हरि खतिवडाले भन्नुभयो– ‘ठक्करका कारण सुमो क्षतविक्षत भएको छ । फोर्स गाडीमा पनि क्षति पुगेको छ । साँझसम्म फोर्स गाडीका सञ्चालक प्रहरीको सम्पर्कमा आएका छैनन् ।’

ना१ज ४२१० नम्बरको सुमोमा चढेका सिन्धुलीको कमलामाई नगरपालिका–६ रामपुरका ३० वर्षका विक्रम श्रेष्ठ, खाँडादेवी गाउँपालिका–३ रामेछापकी सम्झना भुसाल, उनका ६ वर्षीय छोरा संगीत भुसाल, सुनकोसी गाउँपालिका–१ सिन्धुलीका ४४ वर्षीया प्रमिला नेपाली, सुमोका चालक कमलामाई नगरपालिका–४ सिन्धुलीका हरिबहादुर बल रहेका छन् । दुर्घटनामा घाइते भएका १९ जनाको धुलिखेल अस्पतालमा उपचार भइरहेको छ । उपचार भइरहेकामध्ये ३ जनाको अवस्था गम्भीर छ ।

भारतीय नम्बर प्लेटको यात्रुवाहक यूपी५८टी ८१८१ नम्बरको फोर्स गाडी सुमोसँग जुधेको थियो । बीपी राजमार्गको रोसी गाउँपालिका वडा नम्बर ११ मा उक्त दुर्घटना भएको थियो । जिल्ला प्रहरी कार्यालय काभ्रेले दुर्घटना न्यूनीकरणका लागि अभियान सञ्चालन गरिरहेको भए पनि दैनिक दुर्घटनाको संख्या थपिएको छ । बीपी राजमार्गमा सुमो, हायस तथा हलुका सवारीसाधनको अत्यधिक गतिका कारण दुर्घटना बढेको प्रहरीले बताएको छ । सुमो चालकको निधन भएकाले दुर्घटनाको अन्य कारण पत्ता लाग्न नसकेको प्रहरीले जानकारी दिएको छ ।