क्षेत्रीय विमानस्थल १८ घण्टा संचालन गर्ने निर्णय कार्यान्वयनमा आएको २४ घण्टा पनि नभइ स्थगित भएको छ।

नेपाल नागरिक उड्डयन प्राधिकरणले बिहीबारबाट ७ वटा क्षेत्रीय विमानस्थलहरु बिहान ६ बजेबाट राति १२ बजेसम्म सञ्चालन थालेको थियो। प्राधिकरणको उक्त निर्णयप्रति वायुसेवा संचालक संघले आपत्ति जनाएको थियो । संघले राति ८ बजेपछिका नियमिततर्फका उडान तत्काल गर्न सक्ने अवस्था नरहेको जनाएको थियो ।

नेपाल नागरिक उड्डयन प्राधिकरणमा शुक्रबार भएको वार्तामा विमानस्थल सञ्चालनको निर्णय तत्काल लागु नगर्ने सहमति भएको संघका प्रवक्ता योगराज कँडेलले बताए । निर्णय कार्यान्वयनसम्बन्धमा त्रिभुवन अन्तर्राष्ट्रिय विमानस्थल कार्यालयका महाप्रबन्धक प्रेमनाथ ठाकुरको नेतृत्वमा अध्ययन समिति गठन गर्ने सहमति प्राधिकरण र संघबीच भएको छ। उक्त समितिमा एयरलाइन्स, संघ तथा प्राधिकरणका एक/एक जना प्रतिनिधि रहने छन् ।

प्राधिकरणले रात्रिकालीन उडान भइरहेका र उडान भर्न सक्ने क्षमता भएका विमानस्थलमा बिहीबारबाट सेवा थालेको थियो । प्राधिकरणले जेठ १५ गतेबाट अन्तर्राष्ट्रिय विमानस्थल चौबिसै घण्टा सञ्चालन गर्ने निर्णय यसअघि नै गरेको छ ।