विराटनगर – मोरङको पथरीशनिश्चरे नगरपालिका–४ का ५३ वर्षीय खड्कप्रसाद सिलवाल लागुऔषध खैरो हेरोइन (ब्राउन सुगर)सहित पक्राउ परेका छन्। भारतबाट खैरो हेरोइन लिएर आउँदै गर्दा मोरङको रतुवामाई नगरपालिका–३ बाट प्रहरीले सिलवाललाई नियन्त्रणमा लिएको हो।

उनले चलाएको बा ७६ प ४६९७ नम्बरको मोटरसाइकललाई नियन्त्रणमा लिएर चेकजाँच गर्दा लागुऔषध फेला परेको मोरङ प्रहरीका प्रवक्ता प्रवक्ता डीएसपी दीपक श्रेष्ठले जानकारी दिए।

सिलवालको साथमा ६ सय ८८ ग्राम ब्राउन सुगर बरामद भएको उनको भनाइ छ। डीएसपी श्रेष्ठले पक्राउ परेका सिलवालविरुद्ध लागुऔषध ऐनअन्तर्गतको मुद्दा चलाउन अदालतबाट मंगलबार म्याद थप गरेर अनुसन्धानको बाँकी प्रक्रिया अघि बढाइएको बताए।