पहिचान नखुलेको सवारीसाधनले मोरङको बूढीगङ्गा गाउँपालिका–२ मा ठक्कर दिँदा एक जनाको मृत्यु भएको छ ।

कोसी लोकमार्गअन्तर्गत बूढीगङ्गा–२ मा नम्बर नखुलेको स्कारपिओ गाडीले ठक्कर दिँदा घाइते भएका भारत बिहारका ५५ वर्षीय अनिल सिंहको मृत्यु भएको मोरङ प्रहरीका प्रवक्ता डिएसपी दीपक श्रेष्ठले जानकारी दिए । सिंह शिवम् प्लाष्टिक उद्योगमा कार्यरत मजदुर हुन् ।

उनी गत शनिबार साँझ दुर्घटनामा परेका थिए । बूढीगङ्गाकै विराट शिक्षण अस्पतालमा उपचारका क्रममा आइतबार साँझ मृत्यु भएको प्रहरीले जनाएको छ । प्रहरीका अनुसार दुर्घटना गराउने हालसम्म पहिचान नखुलेको सवारीसाधनको खोजी जारी राखिएको छ ।