काठमाडौं – अर्थमन्त्री जनार्दन शर्माले गरिबीका कारण रोग पालेर बस्नुपर्ने बाध्यताको अन्त्य गर्नेगरी बजेट बनाउनुपर्ने बताएका छन्।

आगामी आर्थिक वर्षको बजेट निर्माणका विषयमा आइतबार दिउँसो स्वास्थ्य तथा जनसंख्या मन्त्रालयसँग भएको छलफलमा उनले गरिबीमुक्त गरी रोग लाग्नबाटै जोगाउने गरी स्वास्थ्य मन्त्रालयबाट बजेट र कार्यक्रम प्रस्ताव गर्न आग्रह गरे।

उनले पालिकाहरुमै विज्ञ सेवासहितको अस्पताल र सुविधा सम्पन्न प्रयोगशाला निर्माण हुनुपर्ने बताए। शर्माले पाटन स्वास्थ्य विज्ञान प्रतिष्ठान र त्रिभुवन विश्वविद्यालय शिक्षण अस्पताल, महाराजगञ्जको सेवा अन्यत्र पनि विस्तार गर्ने गरी बजेट र कार्यक्रम प्रस्ताव गर्न आग्रह गरेका छन्।

‘स्वास्थ्य बीमा अति विपन्न परिवारसम्म पुग्ने, सुत्केरी सेवा सुधार गर्ने, मिर्गौला–कलेजोलगायत नसर्ने तर जटिल प्रकारको रोगको उपचार गर्न विदेश जानुनपर्ने स्थिति सृजना गर्नेगरी आगामी बजेटमा सम्बोधन गर्नुपर्नेछ, उनले भने।

बैठकमा स्वास्थ्यमन्त्री बिरोध खतिवडाले ५ सयदेखि १५ सय शय्यासम्मको निर्मित अस्पतालहरुमा चिकित्सकको दरबन्दी र उपकरण व्यवस्था गर्नुपर्ने बताएका छन्।

योजना आयोगका उपाध्यक्ष विश्व पौडेलले मेडिकल टुरिजम बनाउने, नेपालमा असंभव भए मात्र विदेशमा उपचार गर्न जाने व्यवस्था लागू गर्ने, सातै प्रदेशमा रहेको प्रादेशिक अस्पताललाई रिफरल सेन्टरका रुपमा विकसित गर्नुपर्नेलगायतका सुझाव दिएका छन्।