मोरङको पथरीशनिश्चेरमा ट्याक्टरले ठक्कर दिँदा पैदल हिँडिरहेका एक जनाको शुक्रबार राति मृत्यु भएको छ ।

दुर्घटनामा परेर पैदल यात्री मोरङको रतुवामाई नगरपालिका–२ इटहराका ४२ वर्षीय दिनेश भण्डारीको मृत्यु भएको इलाका प्रहरी कार्यालय पथरीका डिएसपी वेदप्रसाद गौतमले बताए । उनका अनुसार उत्तरबाट दक्षिणतर्फ जाँदै गरेको को २ त २८३२ नम्बरको ट्याक्टरले राति ९ बजेतिर पथरीशनिश्चरे–३ आइतबारेस्थित भित्री सडकखण्डमा भण्डारीलाई ठक्कर दिएको थियो ।

गम्भीर घाइते भएका उनको उपचारका क्रममा उर्लाबारीको मङ्गलबारेस्थित मदन भण्डारी अस्पताल अस्पताल एण्ड ट्रमा सेन्टरमा मृत्यु भएको प्रहरीले जनाएको छ । सडक पार गर्दै गरेको अवस्थामा भण्डारीलाई ट्याक्टरले ठक्कर दिएको हो ।

डिएसपी गौतमले ट्याक्टर र चालक पथरीशनिश्चरे–२ का २३ वर्षीय अमृत लिम्बूलाई नियन्त्रणमा लिएर घटनाको अनुसन्धान थालिएको जानकारी दिए । उनका अनुसार लिम्बूको साथमा सवारी चालक अनुमति पत्र (लाइसेन्स) फेला परेन ।