काठमाडौं – बलिउड अभिनेत्री आलिया भट्टको फिल्म ‘गंगुबाई कठियाबाडी’ अप्रिल २६ बाट ओटिटी माध्यम नेटफिल्क्समा रिलिज हुने भएको छ। सिनेमा हलमा फेब्रुअरी २५ मा प्रदर्शनमा आएको फिल्म २६ अप्रिलबाट नेटफिल्क्समा प्रदर्शनमा आउन लागेको हो।

सञ्जय लिला भन्सालीको निर्देशनमा बनेको यो फिल्मले सिनेमा हलमा निकै राम्रो प्रदर्शन गरेको थियो। फरक भूमिकामा देखिएकी आलियाको अभिनयदेखि फिल्मको कथावस्तुलाई दर्शकले निकै मन पराएका थिए।

हलमा चर्चा कमाएको फिल्म अब भने नेटफिल्क्समा प्रदर्शनमा आउन लागेको हो। बुधबार नेटफिल्क्स इण्डियाको आधिकारिक सामाजिक सञ्जालले फिल्म अप्रिल २६ मा रिलिज हुने जानकारी दिएको हो।

१५० करोड भारतीय रुपैयाँको बजेटमा निर्माण भएको यो फिल्ममा कथा हुसैन जैदीको रहेको छ। फिल्मले सिनेमा हलमा भएको प्रदर्शनबाट करिब सय करोड भारतीय रुपैयाँको आम्दानी गरेको थियो।

फिल्ममा आलिया भट्टसँगै विजय राज, बरुन कपुर, अजय देवगण, सन्तानु महेश्वरी, फ्लोरियन डिब्रालगायतका कलाकारको अभिनय थियो।