सशस्त्र प्रहरीले विराटनगरबाट तस्करीका सामान बरामद गरेको छ । भारतबाट भन्सार छली गरेर अवैध रूपमा भित्राइएका कपडा, किराना पसलका सामान र मोबाइलका पार्टस् बरामद गरिएको छ ।

सशस्त्र प्रहरी बल बिओपी (बोर्डर आउट पोस्ट) रानीका प्रहरी निरीक्षक प्रभातकुमार गौतम नेतृत्वको टोलीले विराटनगर महानगरपालिका–१५ स्थित रानी बसपार्कबाट सामान बरामद गरेको हो । सामान एक लाख ३७ हजार एक सय २५ रूपैयाँ बराबरको रहेको सशस्त्र प्रहरी बल मोरङका प्रमुख एसपी राजकुमार लामिछानेले जानकारी दिए ।

उनका अनुसार सशस्त्र प्रहरीलाई देख्नसाथ तस्करीमा संलग्नहरु सामान छाडेर भागेका थिए । बरामद गरिएको सामान आवश्यक कारबाहीका लागि मङ्गलबार विराटनगर भन्सार कार्यालयमा बुझाइएको एसपी लामिछानेले बताए ।