लेटाङमा महिला प्रहरीको हत्या गरिएको घटनामा संलग्न भएको आरोपमा पक्राउ परेका १६ जनालाई नाबालकलाई जिल्ला अदालत मोरङले अभिभावकको जिम्मा लगाउन आदेश दिएको छ । न्यायाधीश शिशिरराज ढकालको इजलासले कर्तव्य ज्यान मुद्दामा प्रतिवादी बनाइएका एक र अभद्र व्यवहारको मुद्दा चलाइएका १५ गरेर १६ जना नाबालकलाई अभिभावकको जिम्मा लगाउन आदेश दिएको हो । जिल्ला अदालतका सूचना अधिकारी हेमबहादुर बुढाथोकीका अनुसार इजलासको आदेशअनुसार सबै नाबालकलाई अभिभावकको जिम्मा लगाइसकिएको छ ।

अदालतले बोलाएको वा खोजेका बेला अभिभावकले उनीहरूलाई उपस्थिति गराउनुपर्ने बुढाथोकीले बताए । लेटाङ घटनामा संलग्न भएको आरोपमा हालसम्म ७२ जनालाई प्रहरीले पक्राउ गरिसकेको छ । तीमध्ये दुई जनालाई हाजिर-जमानीमा छाडिएको छ । पक्राउ परेकामध्ये १६ जना नाबालक थिए । प्रहरीले अनुसन्धान सकेर मिसिल बुझाएपछि सरकारी वकिल कार्यालय मोरङले एक जनाविरुद्ध कर्तव्य ज्यान र १५ जनाविरुद्ध अभद्र व्यवहारको मुद्दा अदालतमा दर्ता गरेको हो ।

नाबालक प्रतिवादी भएका सबै मुद्दाको छिनोफानो अदालतको बन्द इजलासबाट हुने कानुनी व्यवस्था छ । घटनामा पक्राउ परेकामध्ये साबालक रहेका ४४ जनाविरुद्ध भने जिल्ला प्रशासन कार्यालयमा अभद्र व्यवहारको मुद्दा दर्ता गरिएको थियो । प्रशासन कार्यालयका नायब सुब्बा रमेशकुमार निरौलाका अनुसार मुद्दाका प्रतिवादीलाई प्रमुख जिल्ला अधिकारी काशीराज दाहालको इजलासले धरौटीमा छाड्न आदेश दिएको छ ।

अभियुक्तहरुलाई विगोवापत जनही १० हजार रूपैयाँ र धरौटीवापत पाँच हजार रूपैयाँ लिएर छाड्न प्रशासनले आदेश दिएको निरौलाले बताए । महिला प्रहरीको हत्या भएको लेटाङ घटनामा संलग्न भएको आरोपमा पक्राउ परेकामध्ये १५ जनाविरुद्ध अदालतमा कर्तव्य ज्यान मुद्दा दर्ता गरिएको थियो । मुद्दा दर्ता गरिएकामध्ये १० जनामात्रै पक्राउ परेका छन् । पाँच जना अझै फरार छन् ।

लेटाङ नगरपालिका–५ स्थित शिक्षा विकास माध्यमिक विद्यालयका शिक्षक ५६ वर्षीय मनोजकुमार पौडेलले गत चैत ४ गते सोही विद्यालयमा अध्ययनरत १४ वर्षीया छात्रालाई यौन दुर्व्यवहार गरेको घटना बाहिरिएको थियो । घटनाको विरोधमा सुरु भएको आन्दोलन हिंसात्मक झडपमा परिणत हुँदा चैत ६ गते महिला प्रहरी जवान २६ वर्षीया उर्मिला श्रेष्ठको हत्या भयो ।

गोली प्रहारबाट उनको मृत्यु भएको खुलेको छ । शिक्षक पौडेलविरुद्ध दर्ता भएको जबरजस्ती करणी उद्योगको मुद्दामा पनि अदालतबाट आदेश आइसकेको छ । न्यायाधीश दुर्गा खड्काको इजलासले उनलाई पुर्पक्षका लागि थुनामा राख्न सोमबार आदेश दिएको अदालतका सूचना अधिकारी बुढाथोकीले बताए ।