काठमाडौं – तनहुँमा नेपाली कांग्रेसका नेता गोविन्दराज जोशीको समूह र नेकपा एमालेबीच चुनावी तालमेल हुने भएको छ ।

गएराति दुवै समूहबीच यस्तो सहमति भएको हो । सहमतिअनुसार तनहुँका १० वटै स्थानीय तहमा जोशी र एमालेका उमेदवारबीच भागबण्डा हुनेछ ।

तर दमौलीमा भने जोशीले आफ्ना छोरा दीपक जोशीलाई उमेदवार बनाएका छन् ।

“कांग्रेस पार्टी हामीसँग मिल्न खोजेन । तिमीहरुको सहयोग चाहिएन भनेपछि एमालेसँग सहमति भएको हो,” जोशीले बाह्रखरीसँग कुरा गर्दै भने, “तनहुँका १० वटा पालिकामै गठबन्धन हुनेछ । तर हामीले सूर्य चिह्न लिदैनौँ । स्वतन्त्र चिह्नमा लड्ने हामीलाई एमालेले सहयोग गर्नेछ भने हामीले एमालेलाई सहयोग गर्नेछौँ ।”

जोशी र एमालेका जिल्लास्तरका नेताहरुबीच यस्तो सहमति भएको बताइएको छ ।