पाल्पा – बगनासकाली गाउँपालिका–८, घिमिरेडाँडाका ८ वर्षीय बालक शशी घिमिरेको डुबेर मृत्यु भएको छ । घर नजिकै खोल्साको पानीमा डुबेर मृत्यु भएको जिल्ला प्रहरी कार्यालयले जनाएको छ ।

पाँच दिनअघिदेखि हराएका बालकको खोजतलास गर्ने क्रममा घर नजिकै खोल्साको पानीमा डुबेर मृत अवस्थामा शनिबार फेला परेको जिल्ला प्रहरी कार्यालयका सूचना अधिकारी बीरन्द्र थापाले जानकारी दिए ।

घरदेखि १ हजार ५ सय मिटर टाढा पर्ने खोल्सीको पानीमा डुबेको अवस्थामा बालक फेला परेको उनले बताए ।

यसैगरी रामपुर नगरपालिका–५, बेझाँड खेतमा स्कुटरको ठक्करबाट ५ वर्षीय बालिका उर्वसी बयम्बु गम्भीर घाइते भएकी छन् ।रामपुरको बेझाँड बजार नजिकै लु ५७ प ४८७४ नम्बरको स्कुटरले ठक्कर दिँदा पूर्वखोला गाउँपालिका–१, सिलुवा घर भइ रामपुर रानाटोल बस्ने बयम्बु घाइते भएको प्रहरीले जनाएको छ । ठक्कर दिने स्कुटरका चालक निस्दी गाउँपालिका–५, गल्धाका हिमाल बाह्रघरे पनि घाइते भएका छन् । चालक र स्कुटर प्रहरी नियन्त्रणमा रहेको थप अनुसन्धान भइरहेको प्रहरीले जनाएको छ ।