ओखलढुङ्गाको मानेभन्ज्याङ गाउँपालिका-६ हर्कपुरस्थित सिद्दीचरण राजमार्गमा सवारी दुर्घटना हुँदा तीन जना प्रहरी कर्मचारीको मृत्यु भएको छ भने ६ जना घाइते भएका छन् । बुधबार बिहान साँढे ८ बजे जिल्ला प्रहरी कार्यालय सोलुखुम्बुबाट प्रदेश प्रहरी कार्यालय बिराटनगर आउँदै गरेको बा.१७ च १०९४ को डबल क्याप बोलेरो गाडी सडकबाट १५० मिटर तल झरी दुर्घटना भएको थियो ।

सो दुर्घटनामा बलेरोमा सवार प्रहरी हवल्दार भुपेन्द्र कार्की र प्रहरी जवान मानिक राजवंशीको घटनास्थलमा नै मृत्यु भएको र प्रहरी जवान रूपन विष्टको उपचारको क्रममा नेपाल प्रहरी अस्पताल काठमाडाैँमा मृत्यु भएको हो ।

उक्त दुर्घटनामा घाइते भएका प्रहरी निरीक्षक ऋषिराज ढकाल, प्रहरी सहायक निरीक्षक नवराज दाहाल, प्रहरी वरिष्ठ हवल्दार बिशाल श्रेष्ठ, भुपेन्द्र खनाल र चालक लीलाप्रसाद खनाललाई स्थानीय मेडिकलमा उपचारपश्चात थप उपचारको लागि नेपाली सेनाको हेलिकप्टरबाट काठमाडाैँ लगिएको प्रहरीले जनाएको छ ।

यस्तै, प्रहरी नायव निरीक्षक धनराज खतिवडा स्थानीय मेडिकलमा उपचारपश्चात डिस्चार्ज भएका छन् । घटना सम्बन्धमा थप अनुसन्धान भइरहेको प्रहरीले जनाएको छ ।