काठमाडौं – सन् २०२२ को पहिलो त्रैमासिकमा टेस्लाको विद्युतीय सवारीको बिक्री गत वर्षको सोही अवधिको तुलनामा ६८ प्रतिशतले वृद्धि भएको छ ।

टेस्ला कम्पनीले सार्वजनिक गरेको प्रतिवेदन अनुसार यो वर्षको पहिलो त्रैमासमा कम्पनीले तीन लाख १० हजार ४८ वटा विद्युतीय कार विक्री गरेको छ ।

यो संख्या कम्पनीको अनुमानभन्दा पनि बढी भएको प्रतिवेदनमा उल्लेख छ । किनभने यो वर्ष कम्पनीको उत्पादनमा ह्रास आएको थियो । साथै यसको आपूर्तिमा पनि समस्या देखिएको थियो ।

अर्कोतर्फ कम्पनीको चीनमा रहेको प्लान्ट बन्द गरिएको थियो । आपूर्ति श्रङ्खला र चीनको कोभिड नीतिका कारण धेरै सास्ती भएपनि टेस्ला टिम र मुख्य आपूर्तीकर्ताहरूले उल्लेखनीय भूमिका खेलेको कम्पनीका सीईओ एलन मस्कले बताएका छन् ।

यो वर्ष कम्पनीले तीन लाख आठ हजारको हाराहारीमा विद्युतीय कार बिक्री हुने अनुमान गरेको थियो । यो अवधिको बीचमा कम्पनीले तीन लाख पाँच हजार ४०७ वटा नयाँ कार उत्पादन गरेको थियो ।

पछिल्लो समयमा विद्युतीय सवारीको उत्पादन र बिक्रीमा टेस्लाले बजारमा आफ्नो प्रभुत्व जमाइरहेको छ । यो बीचमा कच्चा पदार्थको मूल्य वृद्धि भएको भन्दै कम्पनीले गाडीको मूल्य पनि बढाइएको थियो ।

तर यसको असर बिक्रीमा खासै नपरेको प्रतिवेदनले देखाएको छ ।