उदयपुर – मदनभण्डारी राजर्मागको बेल्टार गाईघाट खण्ड अन्तर्गत उदयपुरको चौदण्डीगढी नगरपालिका – १० देवधारमा आइतबार दिउँसो दुर्घटना हुँदा एक जनाको मृत्यु भएको छ ।

दुर्घटनामा दुई जना घाइते भएका छन् । उदयपुर सदरमुकाम गाईघाटबाट बेल्टारतर्फ जाँदै गरेको स १ ह ३१९ नम्बरको अटोलाई विपरीत दिशाबाट आउँदै गरेको टिपरले ठक्कर दिँदा चौदण्डीगढी नगरपालिका – ६ बेल्टार बजारका अन्दाजी ६५ वर्षीय दण्डीराम तिमल्सिनाको घटनास्थलमै मृत्यु भएको छ ।
अटोमा सवार चौदण्डीगढी नगरपालिका २ का ४८ वर्षीय शिवराज कटुवाल र वडा नम्बर ७ का विनोद कार्की घाइते भएको इलाक प्रहरी कार्यालय बेल्टारले जनाएको छ ।

घाइते दुवैको अवस्था गम्भीर रहेकोले उपचारका लागि धरान पठाइएको प्रहरीले जनाएको छ । अटोलाई ठक्कर दिने टिपरको अहिलेसम्म पहिचान खुल्न सकेको छैन । स्थानीयका अनुसार अटोलाई ठक्कर दिएर टिपर फरार भएको थियो । उक्त टिपर र चालकको खोजी कार्य भइरहेको प्रहरीले जनाएको छ ।