भारत – ‘द कश्मीर फाइल्स’ ले राम्रो व्यापार गरिरहेको छ । यसको प्रभाव भने अक्षयकुमारको फिल्म ‘बच्चन पाण्डे’ मा परेको छ ।

‘द कश्मीर फाइल्स’ को कुरा गर्ने हो भने यो फिल्मले पाइरहेको प्रतिक्रियासँगै यसले उठाएको विषयले यसलाई चर्चामा ल्याएको हो । यसको प्रभाव व्यापारमा पनि देखिएको छ । प्रदर्शनको पहिलो दिन ३ करोड ५५ लाखको व्यापार गरेको फिल्मले पहिलो साता दुई सय करोड आँकडा पार गरिसकेको छ ।

यो व्यापार हिन्दी भाषामा मात्र गरेको छ । यो रफ्तारले फिल्मको व्यापार तीन सय करोड आसपासमा हुने अनुमान भारतीय फिल्मको ट्रेड विश्लेषण गर्ने विश्लेषकहरूले गरेका छन् ।

कश्मीरमा मुस्लिम पृथकतावादीले सन् १९९० को दशकमा चलाएको कश्मीर पण्डित सफाया नामक हिंसामाथि बनेको फिल्मलाई लिएर अहिले भारतमा चर्चा छ । यसमा छलफल बढेसँगै फिल्म हेर्नेको संख्या पनि बढ्दो छ ।

‘द कश्मीर फाइल्स’ राम्रो आम्दानी गरिरहेको छ भने यसको सिधा प्रभाव फिल्म ‘बच्चन पाण्डे’ मा परेको छ । फिल्मले एक सातामा मात्र ५० करोडको हाराहारीमा व्यापार गर्न सफल भएको छ ।

फिल्म असफल भएको अक्षय स्वयमले स्वीकारे । भोपालमा भएको एक इभेन्टमा अक्षयले निर्देशक विवेक अग्नीहोत्रीको कामको निकै प्रसंसा गरे । ‘द कश्मीर फाइल्स’ ले हाम्रो देशको तितो यथार्थलाई बाहिर ल्याएको छ । यो एउटा बहसको विषय हो ।

फिल्मलाई दर्शकले हेरे र हेर्नु पर्ने पनि थियो’ अक्षयले भने । उनले ‘द कश्मीर फाइल्स’ले आफ्नो फिल्मलाई समेत डुबाएको स्वीकारे ।